Dogana e Kosovës ka njoftuar se në Pikëkalimin Kufitar në Merdare janë konfiskuar mallra të padeklaruara, pasi gjatë kontrollit të një autobusi të linjës ndërkombëtare janë zbuluar 500 cigare elektronike me vlerë rreth 10 mijë euro.
Dogana e Kosovës ka njoftuar për konfiskimin e mallrave të padeklaruara në Pikëkalimin Kufitar Merdare.
Sipas njoftimit, më 4 prill 2026, në Merdare është paraqitur një autobus i linjës ndërkombëtare, ndërsa gjatë procedurave fillestare të kontrollit, zyrtarët doganorë kanë pyetur drejtuesin e automjetit nëse kishte mallra për të deklaruar, me ç’rast ai është përgjigjur negativisht.
Në bashkëpunim me Policinë e Kosovës, automjeti është selektuar për kontroll të vijës së dytë dhe është dërguar në hapësirat e kontrollit të detajuar.
Gjatë kontrollit, në pjesën e motorit dhe në hapësirën e tualetit është zbuluar mall i fshehur.
Janë evidentuar tri pako me cigare elektronike, në sasi prej 500 copë, me vlerë të përafërt rreth 10 mijë euro.
Dogana e Kosovës thekson se ka ndërmarrë veprimet përkatëse duke ndaluar përkohësisht mallin deri në përfundimin e procedurave administrative.
“Dogana e Kosovës mbetet e përkushtuar në zbatimin e ligjit dhe në parandalimin e veprimtarive të kundërligjshme në kufi”, thuhet në njoftimin e institucionit.
