Lituania po përgatit një kërkesë drejtuar Shteteve të Bashkuara për bashkëpunim në hetimin e saj mbi trafikimin e mundshëm të qenieve njerëzore, rast i lidhur me pedofilin amerikan Jeffrey Epstein.
Prokurorja e Përgjithshme e vendit tha se vendi po bën gati kërkesën për ndihmë ligjore nga përtej oqeanit. Hetuesit kanë marrë në pyetje rreth 20 persona si pjesë e hetimit, por prokurorët nuk kanë ngritur akuza kundër askujt. Prokurorja i bëri thirrje çdo viktime të dyshuar për trafikim që të paraqitet tek autoritetet.
Ajo shtoi se është krijuar një linjë telefonike e dedikuar për viktimat ose këdo që ka informacion përkatës. Zyra e Prokurorit të Përgjithshëm nisi hetimin paraprak në fillim të shkurtit, pasi vlerësoi informacionin e përfshirë në miliona dokumente në lidhje me Epstein, të publikuara nga Departamenti amerikan i Drejtësisë.
Lituania përmendet mbi 1,200 herë dhe Vilniusi më shumë se 1,000 herë. Dosjet tregojnë një kërkesë të datës 20 janar 2017 për të transferuar 75,000 euro në një llogari bankare lituaneze dhe transferta të tjera ku janë të përfshirë personazhe apo organizata lituaneze.
Epstein u dënua në vitin 2008 për abuzim seksual me vajza të mitura dhe kaloi 13 muaj në burg. Në vitin 2019, ai u arrestua sërish për akuza për trafikim qeniesh njerëzore dhe më vonë atë vit ai i dha fund jetës në burg./abcnews.al
