Në prag të 15 Marsit – Ditës Ndërkombëtare të Konsumatorit, në Universitetin “Haxhi Zeka” në Pejë u mbajt konferencë tematike me fokus mbrojtjen dhe avancimin e të drejtave të njeriut, me theks të veçantë te të drejtat e konsumatorit, ku u theksua nevoja për zbatim më të fortë të ligjit, koordinim institucional dhe ndërgjegjësim publik.
Me temën “Mbrojtja dhe avancimi i të drejtave të njeriut në Kosovë – konsumatori, shteti dhe përgjegjësia e përbashkët”, në prag të 15 Marsit – Ditës Ndërkombëtare të Konsumatorit, Qendra për Paqe dhe të Drejta të Njeriut në Universitetin “Haxhi Zeka” në Pejë organizoi konferencë tematike kushtuar mbrojtjes dhe avancimit të të drejtave të njeriut, me fokus të veçantë në të drejtat e konsumatorit si pjesë integrale e të drejtave ekonomike dhe sociale.
“Me këtë tryezë po tentojmë që nga niveli universitar t’i diskutojmë këto problematika, këto çështje dhe, në këtë kuptim, të dalim me rezultate konkrete dhe me rekomandime me të cilat do t’i përmirësojmë edhe plan-programet e universitetit që kanë të bëjnë me pjesën e programeve të shkencave shoqërore, në mënyrë që ta ngrejmë zërin rreth dobësive të sistemit tonë karshi nevojave që i ka konsumatori”, tha VOX: profesori Armand Krasniqi, rektor i Universitetit “Haxhi Zeka” në Pejë.
“Ne të gjithë, një nga një, mund të bëjmë shumë nëse koordinohemi dhe organizohemi mirë dhe jemi zëri i konsumatorit, zëri i blerësve tanë, të cilët në asnjë segment dhe në asnjë moment nuk duhen lejuar që të jenë pre e mashtrimeve, të cilat bëhen me qëllim të vetëm për përfitim marramendës të personave përgjegjës të subjekteve ekonomike”, deklaroi Lumturije Vuçetaj, kryeprokurore në PTH në Pejë.
“Rolin primar në këtë rast dhe të drejtpërdrejtë të mbrojtjes së konsumatorit e kanë organet publike administrative, siç janë Inspektorati i Tregut, Agjencia e Ushqimit dhe Veterinarisë, Autoriteti i Konkurrencës, sepse në rast se konsumatorët hasin ndonjë praktikë të dëmshme apo çmim të padrejtë, apo mashtrim në reklamimin e çmimeve, ata kanë të drejtë ta njoftojnë Inspektoratin e Tregut, i cili pastaj fillon procedurat e verifikimit dhe inspektimit, konstaton shkelje dhe shqipton masa administrative”, tha Vlora Pacolli Rexhepi, gjyqtare në Gjykatën Komerciale.
E ndërkaq, përfaqësuesi i Avokatit të Popullit, Arbër Berisha, përmendi disa raste ku është dëmtuar konsumatori i Kosovës. Ai tha se një prej këtyre rasteve më të rënda është faturimi i energjisë elektrike në veriun e Kosovës, i cili i ka prekur të gjithë konsumatorët e Republikës së Kosovës.
“Rast pas të cilit institucioni i Avokatit të Popullit ka dalë me një raport, ka nxjerrë rekomandimet e veta, ka dërguar rastin në organet gjyqësore dhe në të gjitha shkallët është fituar si rast. Dhe tani rasti është te Zyra e Rregullatorit për Energji, ndërsa ka mbetur që ZRRE-ja se si do ta gjejë atë modalitet të zbatimit në mënyrë që t’i kompensojë qytetarët e Kosovës”, deklaroi Arbër Berisha, këshilltar ligjor i Avokatit të Popullit.
Kosova ka bërë hapa të rëndësishëm në ndërtimin e kornizës ligjore për mbrojtjen e konsumatorit dhe të drejtave të njeriut, por sfidat vazhdojnë të mbeten të dukshme në planin e zbatimit praktik, koordinimit institucional dhe ndërgjegjësimit publik, ishin disa nga rekomandimet e kësaj tryeze.
