Presidentja e Kosovës, Vjosa Osmani, në Ditën Ndërkombëtare të Gruas, ka uruar dhe falënderuar gratë për kontributin e tyre në shumë fusha.Presidenca përmes një komunikate bëri të ditur se Osmani u shpreh se përulet me respekt para grave të Kosovës – shtyllave të familjes dhe shoqërisë.
“Faleminderit nënave, mësueseve, grave prijetare, të cilat hapën rrugë me guxim, si dhe të gjitha grave që çdo ditë mbajnë në këmbë shoqërinë tonë: në arsim, shëndetësi, drejtësi, biznes, shkencë, kulturë, media, diplomaci e politikë” – ka thënë Osmani.
Tutje, ajo ka shprehur mirënjohje edhe për “ato që përballen me sfida çdo ditë, si dhe për gratë që nuk janë më mes nesh, por mbeten pjesë e historisë dhe lirisë sonë”.
“Uroj që zëri i grave të vazhdojë të dëgjohet, potenciali i tyre të mbështetet dhe angazhimi i tyre të çmohet! E ardhmja e Kosovës është po aq e ndritshme sa mundësitë që u japim grave!” – ka shtuar Osmani.
Kolektivi “Marshojmë S’festojmë” sot më 08.03.2026 ka mbajtur një marsh protestues në Prishtinë për të drejtat e grave.Me sloganin “Marshojmë për jetë me dinjitet”, aktivistët dhe aktivistet kërkuan drejtësi, liri dhe dinjitet për gratë në Kosovë.
