Sot për nder të ditës së pavarësisë së Ukrainës në objektin e Qeverisë së Republikës së Kosovës janë vendosur flamujt i shtetit të Ukrainës, raporton KosovaNews.
Në konferencën për media të kryeministrit Kurti pas përfundimit të mbledhjes së Qeverisë, deklaroi se qeveria e Kosovës, në ditën e pavarësisë së Ukrainës ka marrë vendim për vazhdimin e mbështetjes nga Qeveria për qëndrimin e gazetarëve ukrainas në Republikën e Kosovës.
Përveç strehimit e mundësimit për të vazhduar raportimin e gazetareve, kryeministri Kurti deklaroi se ky është një akt simbolik i solidaritetit tonë me popullin ukrainas.
“Derisa jemi në këtë konferencë në oborrin e ndërtesës së Qeverisë sonë po valojnë flamujt e Ukrainës, është dita e tyre e pavarësisë dhe njëkohësisht shënojmë 6 mujorin e agresionit, invazionit të pajustifikuar e të pajustifikueshëm e të paprovokuar të Federatës Ruse ndaj shtetit dhe popullit të Ukrainës”, u shpreh kryeministri Kurti.
Gjatë ditës së sotme, edhe presidentja e vendit Vjosa Osmani, i ka dërguar letër presidentit të Ukrainës, Volodymyr Zelensky, në ditën e pavarësisë së shtetit ukrainas.
Përmes një postimi në twitter, Osmani ka thënë se Kosova qëndron krah Ukrainës dhe popullit të saj në çdo veprim derisa fitorja e luftës t’i shkojë Ukrainës.
“Letra ime drejtuar presidentit Zelensky dhe popullit ukrainas në ditën e tyre kombëtare. Ne jemi me ju në shpirt, ne jemi me ju në veprim dhe do të jemi me ju derisa Ukraina të fitojë”, ka shkruar Osmani.
Osmani ka thënë se e ndajnë dhimbjen e popullit ukrainas të cilët po vuajnë nga krimet dhe gjenocidi rus.
“Ne e dimë se si ndihet të jesh një objektiv i një regjimi gjenocidal dhe hegjemonist, dhuna e të cilit është njëkohësisht brutale dhe pa dallim”, ka shkruar më tej Osmani./KosovaNews/
My letter to President @ZelenskyyUa & the Ukrainian people on their national day.
— Vjosa Osmani (@VjosaOsmaniPRKS) August 24, 2022
We’re with you in spirit, we’re with you in action, and we’ll be with you until Ukraine wins.
Slava Ukraini! ???? pic.twitter.com/29SYbOQ7PE
