Partia Demokratike e Kosovës reagon ashpër ndaj qëndrimeve të Prokurorisë së Gjykatës Speciale në Hagë.
Ata kanë thënë se kjo gjykatë ka devijuar nga misioni i saj themelor për të sjellë drejtësi.
“Në ditën e parë të fazës përmbyllëse të gjykimit, u bë e qartë se nuk kemi më të bëjmë me një proces të zakonshëm gjyqësor, por me një përpjekje të hapur për të deformuar të vërtetën historike dhe për të ndërtuar një narrativë të rreme, ku lufta çlirimtare e popullit të Kosovës tentohet të paraqitet si projekt kriminal. Regjimi i Millosheviqit dhe aparati shtetëror i Serbisë kanë kryer në Kosovë dhe në rajon krime të rënda kundër njerëzimit, spastrime etnike dhe gjenocid, të dokumentuar gjerësisht nga mekanizma ndërkombëtarë të drejtësisë dhe nga faktet historike”, ka reaguar PDK.
Ata kanë thënë se është fakt i ditur që Serbia ishte agresori dhe populli i Kosovës ishte viktimë.
Në këtë kontekst, PDK ka thënë se Ushtria Çlirimtare e Kosovës ishte një organizim popullor, i lindur nga nevoja për rezistencë përballë një regjimi shtypës dhe gjenocidal. Ajo ishte përgjigjje e domosdoshme ndaj dhunës së aparatit shtetëror serb dhe mohimit të çdo rruge tjetër për liri.
“Hashim Thaçi, Kadri Veseli, Jakup Krasniqi dhe Rexhep Selimi nuk po gjykohen si individë të shkëputur nga konteksti historik, por si simbole të rezistencës, të çlirimit dhe të shtetformimit të Kosovës. Kjo qasje e Prokurorisë synon barazimin e viktimës me agresorin dhe kriminalizimin e luftës për liri. Ajo u konkretizua edhe sot përmes kërkesës për dënime absurde që reflektojnë vetëm ndëshkim politik dhe selektiv”, ka thënë PDK në reagim.
Ata kanë shtuar se përpjekja për të ndërlidhur shpalljen e Pavarësisë së Kosovës me një pretendim kriminal, është e papranueshme dhe bie ndesh me parimet themelore të së drejtës ndërkombëtare.
“Partia Demokratike e Kosovës rikonfirmon bindjen e saj të plotë në pafajësinë e çlirimtarëve dhe në legjitimitetin e luftës së Ushtrisë Çlirimtare të Kosovës. Çdo përpjekje për kriminalizimin e kësaj lufte është përpjekje për rishkrim të historisë dhe për cenim të themeleve të shtetit të Kosovës. Partia Demokratike e Kosovës qëndron fuqishëm në mbrojtje të së vërtetës historike, të dinjitetit të luftës çlirimtare dhe të Republikës së Kosovës. Liria nuk është krim. Dhe historia nuk mund të rishkruhet”, ka thënë PDK. /Lajmi.net/
