Një avion pasagjerësh i linjës ajrore shtetërore kolumbiane Satena është rrëzuar në një zonë malore të vendit, duke shkaktuar vdekjen e të gjithë personave që ndodheshin në bord.
Sipas autoriteteve, avioni i tipit Beechcraft 1900 po kryente fluturimin NSE 8849 nga qyteti Cúcuta drejt Ocana, kur kontakti me kullën e kontrollit u humb vetëm 11 minuta para uljes së planifikuar. Në bord ndodheshin 13 pasagjerë dhe dy anëtarë të ekuipazhit.
Mbetjet e avionit janë lokalizuar në një zonë të vështirë malore, ndërsa ekipet e shpëtimit kanë nisur menjëherë operacionet e kërkimit dhe verifikimit në terren.
Mes viktimave janë identifikuar edhe ligjvënësi Diógenes Quintero Amaya, si dhe Carlos Salcedo, kandidat në zgjedhjet e ardhshme parlamentare, çka i ka dhënë ngjarjes edhe një dimension politik.
Shkaqet e aksidentit ende mbeten të paqarta, ndërsa autoritetet kolumbiane kanë nisur hetimet për të zbardhur rrethanat e plota të tragjedisë.
