Ministrja e Arsimit, Shkencës, Teknologjisë dhe Inovacionit, Arbërie Nagavci, ka njoftuar se i është drejtuar zyrtarisht Prokurorisë Speciale të Republikës së Kosovës lidhur me, siç ka thënë ajo, shkeljet ligjore në procesin e zgjedhjes së drejtorit të Institutit Albanologjik të Kosovës.
Në një reagim publik, Nagavci ka bërë të ditur se këtë veprim e kishte paralajmëruar dy ditë më parë, ndërsa sot ka dorëzuar një shkresë përmes së cilës ka kërkuar fillimin e procedurës penale ndaj personave të dyshuar.
Sipas ministres, personat përgjegjës, në kundërshtim me detyrat dhe përgjegjësitë e tyre ligjore, dyshohet se kanë kryer disa vepra penale, përfshirë: keqpërdorimin e pozitës apo autoritetit zyrtar sipas Nenit 414, paragrafi 1 të Kodit Penal të Republikës së Kosovës, cenimin e të drejtave në marrëdhëniet e punës sipas Nenit 218, si dhe bashkëkryerjen sipas Nenit 31 të të njëjtit Kod Penal.
Nagavci ka theksuar se, bazuar në raportet dhe dokumentet zyrtare të pranuara deri më tani, është konstatuar se bëhet fjalë për veprime të kundërligjshme me qëllim të përfitimit të pozitave dhe beneficioneve që rrjedhin nga to, duke tejkaluar autorizimet dhe kompetencat ligjore dhe duke mos respektuar legjislacionin në fuqi.
“Pres që ky rast të trajtohet me seriozitetin e duhur nga organet kompetente dhe që përgjegjësit të përballen me drejtësinë në përputhje me ligjin”, ka deklaruar ministrja.
Ajo ka shtuar se Ministria e Arsimit mbetet e përkushtuar fuqishëm ndaj respektimit të ligjit, transparencës dhe parimit të meritokracisë në të gjitha proceset institucionale.
