Gjatë 24 orëve të fundit, Policia e Kosovës ka raportuar një sërë rastesh penale dhe intervenimesh në disa rajone të vendit.
Në Prishtinë, është arrestuar një i dyshuar për blerje, posedim, shpërndarje dhe shitje të paautorizuar të narkotikëve, pasi në veturë dhe banesë iu janë gjetur rreth 20 mijë tableta ekstazi dhe sasi marihuane. I dyshuari është dërguar në mbajtje.
Po ashtu, në Gllogoc është raportuar një vjedhje e rëndë në objektin e Ibër Lepencit, ku dëmet vlerësohen rreth 15 mijë euro.
Një rast i rëndë dhunimi është raportuar në Fushë Kosovë, ku viktima ka deklaruar se është droguar dhe dhunuar nga dy persona të panjohur. Rasti është në hetime dhe viktima është dërguar në IML për ekzaminim.
Ndërkohë, në Llapushnik është raportuar zjarrvënie e qëllimshme në një market, ku si i dyshuar është shoqëruar një i mitur.
Në rajonin e Gjilanit, pesë persona janë arrestuar për vrasje në tentativë pas një rrahjeje me mjete të forta, ndërsa është raportuar edhe një rast hetimi i vdekjes dhe një rast keqpërdorimi të detyrës zyrtare në spitalin e Gjilanit, me dëm rreth 20 mijë euro.
Po ashtu, në Lipjan është arrestuar një person në bazë të një urdhër-arresti ndërkombëtar të INTERPOL-it.
Raste të armëmbajtjes pa leje janë raportuar në Prizren, Skenderaj dhe Leposaviq, ku të dyshuarit janë arrestuar dhe më pas liruar në procedurë të rregullt.
Në Pejë është evidentuar një rast dhune në familje, ndërsa në Pikën Kufitare Merdarë është sekuestruar një sasi e vogël narkotikësh te një pasagjer autobusi.
Në rajonet Ferizaj, Gjakovë dhe disa drejtorate të tjera nuk është raportuar ndonjë ngjarje me rëndësi.
