Ka ndërruar jetë sot Shemsi Krasniqi – Shemi, një nga zërat më të njohur dhe më përfaqësues të muzikës shqiptare. Kryeministri Albin Kurti përmes një postimi, ku ka vlerësuar kontributin e jashtëzakonshëm artistik dhe shpirtëror të këngëtarit.
Si vokalist i grupit legjendar “Ilirët”, Shemi i dha fytyrë një etape të rëndësishme të muzikës shqiptare, duke hyrë në shtëpitë e shqiptarëve kudo pa trokitur dhe duke krijuar ndjenjën e bashkësisë edhe në kohë ndarjesh e largësish. Me interpretimin e tij, kënga u kthye në kujtesë kolektive, ndërsa kujtesa në këngë.
Veçanërisht kënga “Xhamadani vija-vija” mbetet një nga simbolet më të fuqishme të identitetit dhe bashkimit kombëtar, e kënduar dhe e dëgjuar ndër breza si shenjë përkatësie për shqiptarët kudo që ndodhen.
“Ka zëra që nuk janë vetëm art, por janë gjuhë e përbashkët emocioni shpirtëror”, ka theksuar Kurti, duke shtuar se humbja e një artisti të tillë është një pikëllim mbarëkombëtar.
Ngushëllime u janë shprehur familjes së Shemsi Krasniqit, miqve, bashkëpunëtorëve dhe gjithë publikut që e deshi dhe e vlerësoi veprën e tij. Kujtimi dhe mirënjohja për kontributin e tij do të mbeten gjallë sa herë që këngët e tij do të dëgjohen e do të këndohen.
Shemsi Krasniqi – Shemi do të kujtohet si “xhamadani i këngës dhe i shpirtit”, një zë që nuk mbaron me një lajm, por jeton përherë në zemrat e publikut.
U prehtë në paqe. I lehtë i qoftë dheu.
