Kryetari i Këshillit Kombëtar Shqiptar në Luginën e Preshevës, Enkel Rexhepi, ka reaguar të hënën pas publikimit të raportit të Komitetit të Ekspertëve të Kartës Evropiane për Gjuhët Rajonale ose të Pakicave, duke thënë se ky dokument ndërkombëtar vulos të gjitha vërejtjet që Këshilli Kombëtar Shqiptar ka ngritur prej vitesh për moszbatimin e të drejtave gjuhësore të shqiptarëve në Serbi.
Sipas Rexhepit, raporti konstaton qartë se gjuha shqipe, edhe pse me status zyrtar në komunat me popullsi shqiptare, vazhdon të mos funksionojë në praktikë.
Institucionet shtetërore serbe, thuhet në dokumentin evropian, “nuk ofrojnë dokumente, formularë, platforma digjitale, tabela informuese apo komunikim zyrtar në gjuhën shqipe, ndërsa mungesa e stafit dygjuhësh vetëm sa thellon diskriminimin”.
Ai kujtoi se rekomandimet e Kartës Evropiane nuk janë zbatuar që prej vitit 2008, çka, sipas tij, e bën edhe më të rëndësishme vlerësimin e ekspertëve ndërkombëtarë që rikonfirmojnë saktësinë e evidencave të paraqitura nga Këshilli Kombëtar Shqiptar ndër vite.
Rexhepi rikujtoi se në shkurt të këtij viti, gjatë Tryezës së Implementimit të Kartës, në një takim trepalësh mes Komitetit të ekspertëve, Këshillit Kombëtar Shqiptar (të përfaqësuar nga Alban Alili), organizatës “The Future” dhe palës serbe, janë prezantuar rekomandime të qarta për përmirësimin e situatës.
“Pala serbe atëherë kishte pranuar detyrimet, përfshirë themelimin e ekipit të përkthyesve administrativë, përkthimin e dokumenteve zyrtare dhe funksionalizimin e platformave në gjuhën shqipe. Megjithatë, raporti i fundit vë në dukje se asnjë nga këto hapa nuk është ndërmarrë. Asnjë takim pasues nuk është thirrur dhe asnjë masë e dakorduar nuk ka hyrë në zbatim”, konsideron Rexhepi.
Ky konstatim ndërkombëtar, sipas tij, tregon qartë se shqetësimet dhe vërejtjet e Këshillit Kombëtar kanë qenë të sakta dhe të mbështetura në realitet.
“Ai nxjerr në pah mungesën e gatishmërisë së institucioneve shtetërore për të respektuar ligjin dhe për ta trajtuar gjuhën shqipe si gjuhë zyrtare”, theksoi Rexhepi.
Ai shtoi se Këshilli Kombëtar Shqiptar do të vazhdojë të insistojë me vendosmëri në zbatimin e standardeve evropiane dhe garantimin e të drejtave gjuhësore të shqiptarëve në Luginën e Preshevës, duke adresuar shkeljet në të gjitha instancat relevante.
