Ish-ministrja e Drejtësisë dhe nënkryetarja e Kuvendit, Albulena Haxhiu, ka reaguar ashpër ndaj deklaratës së Avokatit të Popullit, i cili kritikoi KQZ-në për moscertifikimin e Listës Serbe në zgjedhjet e parakohshme parlamentare.
Haxhiu e ka quajtur “të çuditshëm dhe të padrejtë” reagimin e institucionit që, sipas saj, po dështon ta përfaqësojë drejt emrin që mban.
“Si është e mundur që për një subjekt si Lista Serbe, që lufton rendin kushtetues të Republikës së Kosovës, nuk e njeh shtetin, ka pasur nënkryetar kryekriminelin Radojçiq dhe jo vetëm që nuk është distancuar nga akti terrorist në Banjskë, por ka mbajtur tri ditë zie për terroristët e vrarë, Avokati i Popullit shprehet i shqetësuar me kaq lehtësi?”, ka shkruar Haxhiu.
Ajo shton se reagimi bëhet edhe më problematik kur merret parasysh fakti se, sipas saj, Avokati i Popullit nuk ka shprehur asnjë shqetësim për tendencat dhe vendimet që po vështirësojnë votimin e mërgatës.
Haxhiu thekson se institucioni nuk duhet të funksionojë me “standarde të dyfishta”, duke rikujtuar se vendimi i KQZ-së nuk është kundër subjekteve serbe apo qytetarëve serbë, pasi disa parti serbe tashmë janë certifikuar. “Arsyet për moscertifikimin e Listës Serbe janë të njohura dhe të justifikuara”, shtoi ajo.
Sipas nënkryetares së Kuvendit, selektiviteti i Avokatit të Popullit bie ndesh me parimet e transparencës dhe paanshmërisë që ky institucion duhet t’i garantojë.
Lexo po ashtu:
