KosovaNews ka siguruar pamje ekskluzive nga operacioni i mbrëmshëm i Policisë së Kosovës në veri, ku janë zbuluar materiale ushtarake të dyshimta me origjinë nga Serbia.
Ministri i Punëve të Brendshme, Xhelal Sveçla, njoftoi se njësitë policore, gjatë patrullimit në një objekt të pabanuar në fshatin Donje Jarinje, kanë gjetur uniforma ushtarake dhe xhaketa me emblema të ushtrisë së Serbisë, si dhe një predhë antitank.
Në postimin e tij, Sveçla theksoi:
“Vazhdojmë me çmontimin e elementeve kriminale e terroriste të Serbisë, në funksion të sigurisë së qytetarëve tanë dhe mbrojtjes së Republikës sonë. Do të vazhdojmë pa u ndalur punën dhe angazhimin tonë në çrrënjosjen e çdo mbetjeje terroriste të Serbisë në vendin tonë.”
Ai shtoi se institucionet e Kosovës mbeten të përkushtuara ndaj ligjit dhe sigurisë:
“Institucionet tona mbeten plotësisht të përkushtuara ndaj ligjit, sigurisë dhe mbrojtjes së sovranitetit dhe integritetit territorial të Republikës së Kosovës. Çdo veprim që cenon sigurinë e qytetarëve tanë do të trajtohet me vendosmëri dhe profesionalizëm.”
Pamjet ekskluzive të siguruara nga KosovaNews, të , tregojnë vendin ku janë gjetur materialet dhe përmbajtjen e tyre.
Hetimet mbi rastin janë duke vazhduar.
