Zëdhënësi i Lëvizjes Vetëvendosje, Arlind Manxhuka, ka reaguar pas polemikave të krijuara të dielën rreth mbylljes së kanalit të TËVË në YouTube – rast që fillimisht u raportua gabimisht si mbyllje e kanalit të emisionit “Logjikonomia”.
Manxhuka tha se disa portale dhe analistë u nxitën të akuzonin Qeverinë dhe LVV-në për “tentim-mbyllje të gojës së kritikëve”, duke e paraqitur rastin si shenjë të instalimit të një forme të censurës.
Sipas tij, këto akuza u hodhën pa verifikuar faktet, pasi më vonë vetë mediumi TËVË sqaroi se mbyllja e kanalit kishte ndodhur për arsye teknike dhe jo për shkak të episodit të “Logjikonomisë”, siç ishte pretenduar fillimisht.
“Prej asaj kohe ende nuk ka asnjë reagim, asnjë kërkim-falje nga ata që me nguti i dhanë një dorë sulmesh LVV-së dhe Qeverisë për tentim-instalimin e diktaturës,” ka shkruar Manxhuka, duke kritikuar mënyrën se si lajmi u shpërnda pa konfirmim nga disa media dhe opinionistë.
Ai kërkoi më shumë përgjegjësi dhe kujdes në raportim, duke thënë se raste të tilla dëmtojnë debatin publik dhe krijojnë tensione të panevojshme.
