Sot zhvillohet ndeshja vendimtare mes Kosovës dhe Sllovenisë, e vlefshme për kualifikimet drejt Kupës së Botës 2026.
Takimi nis në orën 20:45 dhe për të dyja ekipet ka karakter jetik, pasi mund të përcaktojë rrugën drejt Botërorit.
Federata e Futbollit e Sllovenisë ka publikuar udhëzime të posaçme për tifozët, si të huaj ashtu edhe vendas, me synim mbarëvajtjen e organizimit dhe shmangien e tollovive.
Udhëzimet për tifozët e Kosovës
Dyert e stadiumit “Stozice” hapen në orën 18:45. Tifozët kosovarë ftohen të qëndrojnë në zonën e veçantë të tifozëve para tribunës C nga ora 18:00 deri në 20:00, ku do të ketë edhe program shoqërues.
Ata janë ftuar të arrijnë në vendngjarje në kohë, jo më vonë se 19:00, dhe të përdorin vetëm hapësirat e rekomanduara të parkimit.
Paralajmërimet për tifozët vendas
Federata sllovene ka kërkuar nga tifozët e ekipit vendas që të vijnë të pajisur me fanella të bardha, shalle dhe flamuj (pa shkopinj). Sipas njoftimit, stadiumi pritet të jetë plotësisht i rezervuar.
Për arsye sigurie, hyrja në stadium u lejohet vetëm tifozëve që mbajnë simbolet e Sllovenisë, përveç sektorit të dedikuar për tifozët mysafirë (sektori D). Të gjithë tifozët që paraqiten me simbole të ekipeve të tjera, nuk do të lejohen të hyjnë në sektorët A, B dhe C, përveç nëse i dorëzojnë sendet e tyre në depozitën e krijuar posaçërisht.
Federata u bën thirrje tifozëve që të respektojnë rregullat e sjelljes, udhëzimet e rojeve dhe organizatorëve, për të siguruar një atmosferë të sigurt e sportive.
