Ministri në detyrë i Financave, Hekuran Murati, ka reaguar pas kritikave për vonesën e buxhetit të RTK-së, duke theksuar se fajin e ka opozita, e cila po refuzon ta themelojë Komisionin për Buxhet.
“Qe çka thotë ligji për buxhetin e RTK-së! Krejt çka duhet, është një vendim i Komisionit për Buxhet, të cilin opozita po refuzon ta themelojë,” ka shkruar Murati.
Ai ka mohuar pretendimet se ky komision nuk mund të formohet pa u ditur se kush është qeveria e kush opozita.
“Dhe jo, nuk është e vërtetë që Komisioni për Buxhet nuk mund të formohet pa u ditur se kush është qeveria e kush është opozita. Ajo vlen për Komisionin për AKI dhe Komisionin për Mbikëqyrje të Financave Publike. Prandaj ky arsyetim i opozitës nuk vlen,” ka theksuar ai.
Murati ka akuzuar opozitën për sabotim të shtetit, duke thënë se “thjesht, opozita ka vendosur ta sabotojë shtetin.”
Në reagimin e tij, ministri në detyrë ka bashkëngjitur edhe pjesën e ligjit për ndarjet buxhetore, ku thuhet se: “Mjetet sipas këtij paragrafi alokohen dhe transferohen nga Thesari në llogarinë të përcaktuar nga RTK-ja në bankë komerciale, sipas vendimit të Komisionit për Buxhet, Punë dhe Transfere.”
Ndërkohë, punëtorët e RTK-së ende nuk i kanë marrë pagat për muajin tetor. Sindikatat e transmetuesit publik kanë protestuar dhe kanë paralajmëruar greva, duke kërkuar zhbllokimin e buxhetit.
