Një atentat me armë zjarri ka tronditur kryeqytetin këtë të martë, ku ka mbetur i vdekur miku i Emiljano Shullazit, 47-vjeçari Gilmando Dani, i cili sapo kishte mbërritur në Tiranë nga Barcelona, ndërsa është plagosur 40-vjeçari Muçi Shaljani (Sheqeri).
Të dy ishin nisur me avion drejt Barcelonës më 7 nëntor dhe kishin lënë makinën të parkuar në aeroport, ndërsa u kthyen nga Barcelona këtë të martë.
Në momentin kur të dy janë nisur drejt Tiranës, autorët me një tjetër makinë i zunë pritë dhe i qëlluan me breshëri plumbash, ku shoferi Muçi Shaljani (Sheqeri) ka mbetur i plagosur rëndë, ndërsa Gilmando Dani, që ishte pasagjer, ka humbur jetën në vend.
Atentati ka ndodhur pak pas orës 14:15 minuta, në një zonë ku ka një trafik të dendur dhe qarkullimi i mjeteve është shumë i ngadaltë.
Autorët dyshohet se janë larguar në drejtim të Fushë-Krujës dhe kanë qenë me një mjet Toyota. Mjeti u gjet i djegur në fshatin Halil.
Muçi Shaljani është dërguar në spital në gjendje kritike për jetën, ku dyshohet se ka marrë një plumb në kokë.
Automjeti me të cilin po udhëtonte Shaljani dhe viktima Gilmando Dani është me targa AB 099UO.
