Një automjet i KFOR-it amerikan është përfshirë në një vetaksident sot në rrugën nacionale Mitrovicë–Jarinjë, në fshatin Sllatinë të komunës së Leposaviqit.
Sipas autoriteteve, nga aksidenti janë lënduar tre persona, por fatmirësisht asnjëri prej tyre nuk është në rrezik për jetë.
Komandanti i trafikut rajonal në Mitrovicën e Veriut, Munish Avdiu, ka konfirmuar për mediat se automjeti ka humbur kontrollin dhe është rrokullisur, pa u përplasur me ndonjë automjet tjetër.
“Një automjet i KFOR-it amerikan, në rrugën nacionale Mitrovicë–Jarinjë, në fshatin Sllatinë, është rrokullisur pasi ka humbur kontrollin. Tre persona kanë pësuar lëndime trupore, por janë jashtë rrezikut për jetë”, ka deklaruar Avdiu.
