Arbnor Hamiti, ish-kryetar i Forumit Rinor të LDK-së në Mitrovicë, ka njoftuar se i është bashkuar Lëvizjes Vetëvendosje, duke deklaruar se LDK tashmë nuk ekziston në formën e saj të dikurshme, shkruan KosovaNews.
“Nuk ka më LDK në Mitrovicë, e që besa as në Prishtinë. Ata sot janë kokë më kokë me PDK-në, vetëm sa thirren në emër të LDK-së”, ka shkruar Hamiti në një postim në Facebook.
Hamiti tha se vendimi për t’iu bashkuar Lëvizjes Vetëvendosje vjen nga besimi i tij se kjo është forca që po e çon vendin përpara.
“Albin Kurti dhe Lëvizja Vetëvendosje janë e ardhmja e mirë e vendit tonë. Bashkimi im me Lëvizjen është pikërisht për këtë arsye, që ta çojmë përpara të mirën e nisur, së bashku e me përkushtim”, ka shtuar ai.
Ai ka falënderuar kryeministrin Kurti, deputeten Arjeta Fejza dhe ministrin Faton Peci — të cilin e ka quajtur “kryetarin e ardhshëm të Mitrovicës” — për mikpritjen e ngrohtë.
Ndryshe, Hamiti ka qenë për shumë vite pjesë e LDK-së, ku ka mbajtur disa pozita brenda Forumit Rinor, përfshirë edhe atë të kryetarit në degën e Mitrovicës.
Në reagimin e tij, ai ka shprehur zhgënjim me mënyrën se si janë zhvilluar proceset e brendshme në LDK, duke i cilësuar ato si pa kritere dhe pa demokraci.
