Policia e Kosovës ka hapur ditë më parë një tender të ri për furnizimin e punonjësve të saj me pizhame dimri dhe çorape termike. Sipas dokumenteve të publikuara në platformën e E-prokurimit, vlera e parashikuar për këtë tender është rreth 333 mijë euro.
Në kërkesat teknike të tenderit thuhet se operatorët ekonomikë janë të obliguar të dorëzojnë mostra për secilin artikull në ditën e hapjes së ofertave, deri në orën 14:00. Mostrat duhet të përfshijnë të gjitha pjesët e kërkuara sipas specifikimeve teknike të dosjes së tenderit.
Gjithashtu, tenderuesit duhet të ofrojnë atestet përkatëse nga laboratorë të akredituar për të gjithë artikujt e përfshirë në tender. Certifikatat duhet të kenë link për verifikim online dhe adresë emaili, në mënyrë që Autoriteti Kontraktues të mund të verifikojë validitetin e dokumenteve.
Afati i fundit për dorëzimin e ofertave ka qenë më 26 tetor 2025.
Ky tender vjen në kuadër të përgatitjeve të Policisë së Kosovës për sezonin e dimrit, me qëllim të sigurimit të kushteve më të përshtatshme për punë në terren.
