Ish-ministri i Mbrojtjes së Kosovës, Armend Mehaj, ka uruar Republikën e Turqisë me rastin e 102-vjetorit të Ditës Shtetërore, duke theksuar marrëdhëniet e forta miqësore dhe bashkëpunimin strategjik mes dy vendeve.
Në një postim në rrjetet sociale, Mehaj i ka përcjellë urime të sinqerta Presidentit të Turqisë, Rexhep Tajip Erdogan, dhe popullit turk, duke vlerësuar rrugëtimin një shekullor të këtij shteti drejt zhvillimit dhe forcimit të institucioneve moderne.
“Një shekull jetë i Republikës së Turqisë ka qenë i mbushur me sfida, por mbi të gjitha një rrugëtim i qëndrueshëm drejt realizimit të aspiratave kombëtare, zhvillimit dhe forcimit të shtetit modern turk”, ka shkruar Mehaj.
Ai e ka cilësuar Turqinë si një “aleate të palëkundur” të Kosovës, jo vetëm në procesin e shtetndërtimit dhe forcimit të sovranitetit, por edhe në zhvillimin e kapaciteteve mbrojtëse të Forcës së Sigurisë dhe Policisë së Kosovës.
“Turqia ka qenë përherë pranë nesh, qoftë me dronët Bayraktar, kur pak kush besonte se do t’i arrinim, apo me sistemet OMTAS, të cilat i kemi blerë nga Turqia për të siguruar kufirin e vendit në kohë kur kishim vonesa nga aleatët tjerë”, ka theksuar Mehaj.
Ai ka kujtuar gjithashtu ndihmën që Kosova i ofroi Turqisë pas tërmetit shkatërrues, duke theksuar reagimin e menjëhershëm të njësive të kërkim-shpëtimit kosovare “si një aleat i vërtetë që i del në ndihmë mikut në nevojë”.
Në fund, Mehaj ka uruar popullin turk për këtë ditë të shënuar, duke falënderuar për “miqësinë, përkrahjen dhe partneritetin e qëndrueshëm” midis dy vendeve.
