Kryeministri izraelit, Benjamin Netanyahu ka urdhëruar ushtrinë të kryejë sulme intensive ndaj Rripit të Gazës, pas akuzave ndaj Hamasit për shkelje të armëpushimit.
“Ndër të tjera, pas konsultimeve të sigurisë, kryeministri Netanyahu ka urdhëruar ushtrinë të kryejë menjëherë sulme të fuqishme ndaj Rripit të Gazës”, thuhet në një deklaratë të kabinetit të tij.
Izraeli ka akuzuar Hamasin se ka “inskenuar” kthimin e trupave dhe “rivarrimin e mbetjeve”, ndërkohë që të dyja palët rrisin akuzat e ndërsjella për shkelje të armëpushimit në Gaza, raporton timesofisrael.
“Hamas po gënjen. Ata e dinë ku ndodhen pengjet e mbetura. Gërmimet e inskenuara nuk janë vetëm keqdashëse, ato kërcënojnë armëpushimin. Pamjet nga droni tregojnë se Hamas po zhvendos dhe po rivarron mbetjet trupore, dhe më pas inskenon një zbulim të rremë për ta paraqitur Kryqit të Kuq”, njoftoi Ministria e Punëve të Jashtme.
Më herët, kryeministri izraelit tha se mbetjet njerëzore që Hamasi dorëzoi gjatë natës i përkisnin një pengu, trupi i të cilit ishte gjetur më parë nga ushtria izraelite.
Ai ka thirrur komandantët e tij ushtarakë për të vendosur për “hapat e ardhshëm të Izraelit” si përgjigje ndaj situatës, pas së cilës ka urdhëruar sulmet.
Ndryshe, lufta mes Izraelit dhe Hamasit ka nisur pas sulmit terrorist të militantëve palestinezë në Tel Aviv më 7 tetor të vitit 2023.
