Brenda më pak se 24 orësh, Policia Rajonale e Prizrenit ka realizuar dy operacione të ndara, në të cilat janë sekuestruar dy armë zjarri të llojit pistoletë, ndërsa dy persona janë ndaluar për 48 orë.
Në rastin e parë, më 9 tetor 2025, rreth orës 21:15, policia ka marrë informacion se në fshatin Tupec, gjatë një gazmendi familjar, ishin dëgjuar të shtëna me armë zjarri.
Njësitet policore kanë dalë menjëherë në vendin e ngjarjes dhe kanë kontaktuar me pronarin e shtëpisë, i cili ka pranuar se kishte shtënë në ajër. Arma, së bashku me 10 fishekë, është dorëzuar vullnetarisht.
Me urdhër të prokurorit të shtetit, ndaj të dyshuarit është inicuar rast penal dhe ai është ndaluar për 48 orë.
Rasti i dytë ka ndodhur pak pas mesnate, më 10 tetor 2025, rreth orës 00:15, në fshatin Caparc të Prizrenit. Pas një dyshimi të bazuar se në një lokal ndodheshin persona me armë zjarri, njësitë e Stacionit Policor Prizren–Veri kanë ndërhyrë në lokacion.
Gjatë kontrollit, mbrapa lokalit është gjetur një armë zjarri, e cila është konfiskuar nga njësitë e hetimeve dhe krim teknikës. Me urdhër të prokurorit, pronari i lokalit është ndaluar për 48 orë, ndërsa ndaj tij dhe personave të tjerë të përfshirë është iniciuar procedurë penale.
Sipas njoftimit zyrtar të Policisë së Kosovës, ndaj dy të dyshuarve, në të dy rastet, janë inicuar raste penale për veprat “Mbajtje në pronësi, kontroll, posedim apo shfrytëzim të paautorizuar të armës” dhe “Shkaktim i rrezikut të përgjithshëm.”
