Ka përfunduar bastisja e banesës së Fatmir Shehollit, i cili dyshohet për spiunazh.
Automjete e Policisë së Kosovës kanë qëndruar në objektin e banesës së të dyshuarit për rreth dy orë.
Në pamjet e siguruara nga KosovaNews vërehën disa gjëra, ku dyshohet që janë sekuestruar nga banesa e të dyshuarit.
Prokuroria Speciale ka treguar se me asistencë të Agjencisë së Kosovës për Inteligjencë është arrestuar në rajonin e Prishtinës Fatmri Sheholli. Nga PSRK-ja thonë se ai ngarkohet me veprën penale: “Spiunazh”.
“Pas zhvillimit të hetimeve disa mujore, me urdhër të Prokurorisë Speciale të Kosovës, të enjten hetuesit policorë nga Drejtoria për Hetimin e Krimit të Organizuar dhe Krimeve të Rënda në Policinë e Kosovës kanë arrestuar F.SH., nën dyshimet për veprën penale: “Spiunazh”. I dyshuari F.SH., është arrestuar në rajonin e Prishtinës, nën dyshimin e bazuar se ka kryer veprën penale: “Spiunazh”, nga neni 124 paragrafi 3 të KPRK-së. Operacioni i arrestimit është kryer edhe me asistencë të Agjencisë së Kosovës për Inteligjencë. Me aktvendim të Prokurorisë Speciale, i dyshuari është ndaluar për 48 orë, dhe nga njësitet relevante të Policisë së Kosovës janë duke u kryer bastisje në vendbanimin e të dyshuarit, me qëllim të sigurimit edhe të provave të tjera materiale. Prokuroria Speciale e Kosovës, në bashkëpunim dhe koordnim me Policinë e Kosovës, është duke ndërmarrë të gjitha veprimet e nevojshme hetimore, në përputhje me Kodin e procedurës Penale dhe ligjet në fuqi, për të cilat publiku do të njoftohet në kohë”, njofton PSRK-ja.
Kujtojmë se sipas informacioneve të Kosovanews, gjatë momentit të arrestimit, Fatmir Sheholli ishte i shoqëruar edhe me Milaim Zekën, i cili është dërguar po ashtu në stacionin policor për procedura të mëtejshme.
