Transformimi digjital në Ballkanin Perëndimor nuk është me vetëm një kërkesë e kohës, por një domosdoshmëri strategjike në rrugën drejt integrimit evropian.
Kjo ishte edhe një nga mesazhet kryesore të Samitit të Gjashtë Digjital të Ballkanit Perëndimor, i cili po mbahet në Shkup, ku morën pjesë përfaqësues të qeverive nga gjashtë vendet e rajonit, përfshirë këtu edhe Kosovën, e cila u përfaqësua nga zv.ministri i në detyrë ekonomisë dhe inovacionit Getoar Mjeku.
Samiti, i organizuar nga Këshilli për Bashkëpunim Rajonal (RCC), po trajton sfidat dhe mundësitë e zhvillimit digjital në rajon, me theks të veçantë në proceset që ndihmojnë afrimin me tregun e vetëm digjital të Bashkimit Evropian. Një nga hapat më të rëndësishëm të ndërmarrë deri tani, sipas RCC-së, është heqja e tarifave roaming brenda rajonit dhe ulja e ndjeshme e tyre me vendet e BE-së, që tashmë ka dhënë rezultate të prekshme.
“Përdorimi i të dhënave dhe internetit mobil është rritur me 495% vetëm gjashtë muaj pasi prezantuam këtë iniciativë. Ky është një rezultat i madh, sepse është shumë i ndjeshëm për qytetarët dhe bizneset tona,” tha në një konferencë për media Amer Kapetanoviç, Sekretar i Përgjithshëm i Këshillit Rajonal për Bashkëpunim.Në samit po diskutohen edhe projekte të reja që do të kenë ndikim të drejtpërdrejtë në zhvillimin digjital të rajonit, përfshirë portofolin digjital rajonal, sigurinë kibernetike, zgjerimin e rrjeteve me fibra optike, si dhe mbështetjen për startup-et dhe inovacionin.
“Inovacioni digjital është diçka për të cilën po punojmë shumë, veçanërisht me të rinjtë sipërmarrës dhe startup-et. Duam të krijojmë ndoshta edhe një fond inovacioni për Ballkanin Perëndimor, nga i cili do të financohen idetë e reja dhe startup-et”, shtoi Kapetanoviç.Përmes këtyre nismave, Ballkani Perëndimor synon të afrohet me standardet digjitale të BE-së, duke përgatitur qytetarët dhe bizneset për një epokë të re teknologjike.Kjo do t’i mundësojë Kosovës më shumë mundësi për zhvillim ekonomik, inovacion dhe integrim më të shpejtë në tregun evropian.
