Në kuadër të javës së nivelit të lartë të sesionit të 80-të të Asamblesë së Përgjithshme të OKB-së, në Nju Jork është mbajtur një samit shumëpalësh me pjesëmarrjen e Shteteve të Bashkuara, Turqisë dhe gjashtë shteteve të tjera anëtare të Organizatës së Bashkëpunimit Islamik (OIC).
Pas takimit, u publikua një deklaratë e përbashkët, ku theksohet nevoja urgjente për armëpushim në Rripin e Gazës, transmeton KosovaNews.
Deklarata vuri në dukje gjendjen e padurueshme humanitare në Gaza, humbjet e mëdha të jetëve, pasojat e rënda për rajonin dhe ndikimin mbi të gjithë botën islame. Liderët e vendeve pjesëmarrëse falënderuan presidentin amerikan Donald Trump për organizimin e takimit dhe ritheksuan qëndrimin e tyre kundër zhvendosjes së detyruar të palestinezëve, duke kërkuar kthimin e atyre që janë detyruar të largohen.
Në dokument u nënvizua se:
Armëpushimi i menjëhershëm do të mundësonte lirimin e pengjeve dhe dërgimin e ndihmave humanitare.
Një plan i gjerë rindërtimi për Gazën, i mbështetur në iniciativën e Ligës Arabe dhe të OIC, si dhe rregullime sigurie janë të domosdoshme.
Mbështetja ndërkombëtare për udhëheqjen palestineze është thelbësore për t’u dhënë palestinezëve mundësinë të rindërtojnë jetën e tyre.
Ruajtja e stabilitetit në Bregun Perëndimor dhe Kudsin e Shenjtë është prioritet.
Reformat e Autoritetit Palestinez do të kenë përkrahje ndërkombëtare.
Liderët arabë dhe ata të OIC theksuan se do të punojnë së bashku me Trump për t’i dhënë fund luftës dhe për të hapur rrugën drejt një paqeje të drejtë e të qëndrueshme. Ata nënvizuan rëndësinë e ruajtjes së momentit të krijuar nga kjo nismë, duke e konsideruar atë si fillimin e një procesi drejt bashkëpunimit rajonal dhe paqes.
Burimi: AA
