Portugalia ka njoftuar se të dielën do të njohë zyrtarisht shtetin e Palestinës, duke u bërë kështu vendi më i fundit perëndimor që ndryshon politikën e tij në raport me konfliktin izraelito-palestinez, në një kohë kur lufta në Rripin e Gazës nuk po tregon shenja ndalimi, transmeton KosovaNews.
Njoftimi u bë nga Ministria e Jashtme përpara Asamblesë së Përgjithshme të Kombeve të Bashkuara (UNGA), e cila do të mbahet javën e ardhshme në Nju Jork, shkruan BBC.
Franca, Mbretëria e Bashkuar, Kanadaja dhe Australia po përgatiten gjithashtu për të shpallur vendime të ngjashme. Përveç tyre, Spanja, Irlanda, Norvegjia dhe Sllovenia tashmë kanë shpallur zyrtarisht njohjen e Palestinës, duke krijuar një valë të re diplomacie ndërkombëtare që synon të rrisë presionin mbi Izraelin për t’i dhënë fund konfliktit dhe për të hapur rrugën drejt një zgjidhjeje me dy shtete.
Izraeli e ka dënuar fuqishëm këtë veprim, me kryeministrin Benjamin Netanyahu që e quajti një hap që “shpërblen terrorin”, duke iu referuar sulmit të Hamasit më 7 tetor 2023 ndaj Izraelit./KosovaNews/
