Policia e Kosovës ka njoftuar se gjatë 24 orëve të fundit ka intervenuar në dy raste ku mbaheshin ahengje në Mitrovicë dhe Skenderaj, me ç’rast i ka arrestuar dy persona dhe konfiskuar armë zjarri, me të cilat dyshohet se është gjuajtur nga të dyshuarit.
Sipas njoftimit të policisë, një armë është konfiskuar në Mitrovicën e Jugut, pasi ishte raportuar për të shtëna me armë në rrugën e “Hekurudhës”, ku si rezultat i reagimit të shpejtë të njësive policore ka rezultuar që në lokacionin ku kishte aheng familjar është konfiskuar një armë e llojit pistoletë me katër (4) fishek dhe 13 gëzhoja.
Ndërsa policia bëri të ditur se konfiskimi i një arme tjetër të llojit pistoletë është realizuar në fshatin Çubrel të Skenderajt, ku pas pranimit të informatës për të shtëna njësia policore ka identifikuar lokacionin ku kishte aheng familjar, me ç’rast nga i dyshuari kanë konfiskuar armen dhe njëmbëdhjetë (11) gëzhoja.
Për të dyja këto raste në cilësi të të dyshuarve janë arrestuar dy persona, të cilët dyshohet se kanë përdorur armët, ndërsa pas procedurave intervistuese dy të dyshuarit me urdhër të prokurorit janë liruar për procedurë të rregullt.
Ndaj tyre janë iniciuar raste për veprat penale ‘përdorim i armës’, ‘mbajtje në pronësi , kontroll të paautorizuar të armës’. /KosovaNews/
.
