Asambleistja e Lëvizjes Vetëvendosje në Prizren, Mimoza Bushrani, ka shpallur synimin e saj për të kërkuar mandatin e tretë në Kuvendin Komunal në zgjedhjet e 12 tetorit 2025.
Përmes një postimi në rrjetet sociale, Bushrani ka theksuar se ky mandat nuk është për privilegj, por për një mision të qartë: mbrojtjen e të ardhmes së qytetit dhe ndërtimin e një Prizreni ku çdo komunitet dhe qytetar trajtohet me barazi e dinjitet.
“Kam thënë ‘JO’ aty ku ishte më e lehtë të thoja ‘PO’. Kam refuzuar çdo kompromis të padrejtë, çdo pazar që e trajton Prizrenin si mall. Sepse Prizreni nuk është pazari i askujt”, ka deklaruar ajo.
Bushrani ka bërë thirrje për mbështetje, duke theksuar se Prizreni nuk duhet të kthehet në monedhë pazari dhe se qyteti ka nevojë për zhvillim, barazi dhe drejtësi për të gjithë.
Ajo ka premtuar se së bashku me kandidatin për kryetar, Artan Abrashi, do të punojnë për një Prizren më të drejtë, më transparent dhe më të barabartë.
“Prizreni nuk blihet. Prizreni nuk shitet. Prizreni nuk negociohet. Prizreni mbrohet. Prizreni ndërtohet. Prizreni është i yni”, ka përfunduar Bushrani.
