Lidhja Demokratike e Kosovës e ka ripërsëritur qëndrimin se nuk do të jenë pjesë e takimit të parë të Kryesisë së Kuvendit të thirrur nga kryetari, Dimal Basha, ditën kur e shpalli të mbyllur seancën konstituive ndonëse dështoi të zgjidhej nënkryetari i pestë i Kuvendit që i takon komunitetit serb.
Deputetja e LDK-së Jehona Lushaku-Sadriu tha se në ditën kur votuan nënkryetaren nga komunitetet jo serbe ishte një gabim teknik meqë nuk e kishin vërejtur që është bërë ndarja nga pakoja për votim të komuniteteve joshumicë.
“Ai duke ndarë edhe grupet minoritare na pamundësoi ne të marrim pjesë në një votim ashtu siç kanë qenë praktikat parlamentare. Votimi është dashur të shkojë në pako ashtu siç është dakorduar në Kryesi, aty ka pasur një lloj gabimi teknik që ne nuk e vërejtëm që është bërë ndarja, por mendojmë që praktika institucionale brenda Kuvendit do të duhej të respektohej. Në mbledhjen e Kryesisë nuk do të marrim pjesë pikërisht për të shprehur pakënaqësinë tonë për shpalljen e konstituimit derisa nuk është kompletuar Kryesia”, tha ajo.
Këto deklarime u bënë në konferencën për media që LDK-ja e thirri me rastin e fillimit të vitit të ri shkollor.
Lushaku-Sadriu tha se për fat të keq ky vit shkollor nuk e gjen vendin mirë të përgatitur.
“Nuk gjen ndonjë reformë përmbajtjesore që ka ngritur cilësinë e arsimit, nuk shohim ndonjë investim serioz ose prioritizim nga ana e qeverisë. Kjo ka ndodhur përgjatë 4 viteve të kaluara dhe ne sot më 1 shtator do të mund të kishim një ambient shumë të përshtatshëm të klasave duke marrë parasysh që nevoja e nxënësve është që të shkojnë në klasa të rinovuara, me tabela digjitale, me korrikulë digjitale me korrikulë adekuate e jo kaq të ngarkuar siç është sot. Ne i kemi fëmijët që shkojnë në ambiente të papërshtatshme me kushte minimaliste përkundër faktit që MASHTI ka buxhet të mjaftueshëm”, tha tutje ajo.
Ajo tha se ky 1 shtator i gjen edhe mësimdhënësit në një pozitë të papërshtatshme e pa paga dinjitoze.
Gjithashtu Lushaku Sadriut tha se kjo ditë i gjeti edhe prindërit në vështirësi të jashtëzakonshme.
“Fatkeqësisht ky 1 shtator prindërit i gjen në vështirësi të jashtëzakonshme për sigurimin e teksteve shkollore, sepse ministria në pamundësi të përmbushjes së obligimeve ligjore që i ka për sigurimin e teksteve shkollore ka vendosur që këtë përgjegjësi t’ia kalojnë prindërve”, deklaroi ajo.
Ndërsa, drejtori i Arsimit në Prishtinë, Samir Shahini tha se përkundër vështirësive si shkak i bllokimit të buxhetit të komunës, ata janë munduar të bëjnë punën e tyre për t’i ofruar nxënësve e mësimdhënësve në kryeqytet kushte më të mira në shkolla.
