Rrëzohen drunj dhe shpërthejnë zjarre në Hajvali, zjarrfikësit në aksion

Një stuhi e fuqishme që goditi Kryeqytetin para pak orësh shkaktoi rrëzimin e disa drunjve në Rrugën Rexhep Luci dhe në lagjen Ulpiana, ndërsa paralelisht janë përballur edhe disa zjarre fushore në Hajvali dhe në lokacione të tjera të Prishtinës.

Sipas njoftimit nga Drejtoria për Siguri dhe Emergjenca, Brigada Profesionale e Zjarrfikësve, ekipet emergjente dhe Policia e Kryeqytetit kanë dalë menjëherë në terren për të menaxhuar situatën dhe për të garantuar sigurinë e qytetarëve.

“Brigada Profesionale e Zjarrfikësve, ekipet emergjente të Drejtorisë dhe Policia kanë reaguar me profesionalizëm dhe përkushtim për të mbrojtur qytetarët dhe pronën publike e private. Sot u dëshmua edhe një herë se sa të rëndësishme janë ekipet tona fantastike emergjente, të cilat pa u lodhur punojnë për sigurinë e komunitetit,” thuhet në njoftim.

Nga Drejtoria falënderuan ekipet për angazhimin dhe qytetarët për bashkëpunimin në këtë situatë, duke theksuar se siguria mbetet misioni i përhershëm i institucioneve të kryeqytetit.