Sot, në Muzeun Etnologjik të Gjakovës, u mbajt takimi i parë i Komitetit Drejtues për Zhvillimin Urban Qarkor, duke mbledhur përfaqësues nga institucionet qendrore, komunat dhe partnerët zhvillimorë për të forcuar përpjekjet drejt qyteteve më të gjelbra dhe më të qëndrueshme ndaj ndryshimeve klimatike.
“Takimi përfshiu njohjen e ndërsjellë të institucioneve partnere dhe angazhimeve të tyre brenda programit, prezantimin e objektivave për të nxitur qëndrueshmërinë klimatike dhe zhvillimin urban të qëndrueshëm, si dhe krijimin e një kuptimi të përbashkët mbi drejtimin strategjik, koordinimin dhe mekanizmat e zbatimit,” thuhet në njoftim.
Pjesëmarrësit vizituan edhe lumin Lukac, ku planifikohet një projekt demonstrues për të ilustruar hapa praktikë në uljen e rreziqeve klimatike dhe krijimin e hapësirave publike më të shëndetshme dhe më të qëndrueshme.
Mbështetur nga Qeveria Gjermane dhe Sekretariati Shtetëror i Zvicrës për Çështje Ekonomike (SECO), GIZ thekson se “ky partneritet po vendos themelet për zhvillim urban të integruar, gjithëpërfshirës dhe të qëndrueshëm ndaj ndryshimeve klimatike në Kosovë.”
