Gjykata Themelore në Gjilan ka aprovuar kërkesën e Prokurorisë Themelore të Gjilanit dhe ka caktuar masën e paraburgimit prej 30 ditësh ndaj të pandehurve A. S., R. A. dhe R. Z.
“Më 23 gusht 2025, rreth orës 15:00, në fshatin Vërbicë e Zhegovcit, Komuna e Gjilanit, të pandehurit dyshohen se pa autorizim kanë kultivuar bimën e kanabisit. Gjatë kontrollit të kryer nga zyrtarët policor, në oborrin e shtëpisë së të pandehurit A. S., në brendësi të serave të ndërtuara, janë gjetur 496 bimë kanabisi me gjatësi rreth 2 metra. Kjo tregon se të pandehurit kanë kultivuar bimën me qëllim prodhimin e narkotikëve pa autorizim ligjor”, thuhet në njoftim.
Sipas njoftimit, të pandehurit akuzohen për veprën penale “kultivimi i bimës së hashashit, shkurres së kokainës ose bimëve të kanabisit”, sipas nenit 272 paragrafi 1 dhe 31 të Kodit Penal të Republikës së Kosovës (KPRK). Po ashtu, i pandehuri A. S. akuzohet edhe për mbajtje, kontroll ose posedim të paautorizuar të armëve, sipas nenit 366 paragrafi 1 të KPRK-së.
Gjykata ka vlerësuar se për të pandehurin R. A. janë plotësuar kushtet ligjore për caktimin e paraburgimit, pasi ky i fundit ka tentuar të largohet nga vendi i ngjarjes sapo ka kuptuar se po kryhej kontroll policor. Gjykata ka konstatuar gjithashtu se lirimi i të pandehurve do të pengonte rrjedhën e procedurës penale dhe se ekziston rreziku që ata të ndikojnë tek njëri-tjetri.
“Në bazë të veprimeve të mëparshme penale të evidentuara ndaj të pandehurve dhe rrethanave të tjera, gjyqtari i procedurës paraprake ka vlerësuar se masat alternative nuk do të ishin të mjaftueshme për zhvillimin e suksesshëm të procedurës penale, duke marrë kështu vendim për caktimin e paraburgimit. Të pandehurit kanë të drejtë të ankohen ndaj këtij vendimi në Gjykatën e Apelit”, theksohet në njoftim.
