Presidentja e Kosovës, Vjosa Osmani, ka deklaruar se forcat e huaja me qëllime të këqija, si Rusia, po përpiqen të ushtrojnë ndikim në Ballkan, pasi kanë një “interes strategjik” dhe duan të minojnë sistemin e bazuar në vlera të BE-së dhe NATO-s.
Këto komente ajo i bëri në një intervistë ekskluzive për TVP World, gjatë Forumit Evropian në Alpbach të shtunën, transmeton KosovaNews.
Osmani paralajmëroi për rritjen e ndikimit të “trekëndëshit të së keqes” – Rusisë, Kinës dhe Iranit – duke theksuar sfidat më urgjente për Kosovën.
“Unë shpesh them se kur shohim forca keqdashëse si Rusia, Kina dhe Irani, ky trekëndësh i së keqes, që përpiqen të ndikojnë në Ballkanin Perëndimor, ata nuk e bëjnë këtë për bamirësi, por sepse kanë një interes strategjik”, u shpreh Osmani.
Ajo shtoi se për Kosovën sfida më e madhe mbetet Serbia. Duke cituar Misionin Evropian të Vëzhgimit, Osmani theksoi se është dëshmuar ndërhyrja e Serbisë, e ndihmuar dhe e nxitur nga Rusia, në zgjedhjet e fundit parlamentare në Kosovë.
“Sfida jonë më e madhe është fakti që Serbia vazhdon t’i shohë shtetet fqinje si shtete të përkohshme”, tha ajo, duke e krahasuar këtë qasje me “mentalitetin imperialist dhe hegjemoni që ka Rusia”.
Megjithatë, Osmani nënvizoi se në politikën e madhe të Kosovës “nuk ka ndikim rus apo serb, është gjithçka shumë lokale”.
Presidentja theksoi gjithashtu se Kosova synon të anëtarësohet në BE, por mungesa e një shumice parlamentare po pengon realizimin e projekteve evropiane dhe bashkëpunimin me administratën amerikane./KosovaNews/
