Presidentja e Kosovës, Vjosa Osmani, në një intervistë për televizionin polak “TVP World”, u ka bërë thirrje partive politike në Kosovë që të arrijnë një marrëveshje dhe të formojnë institucionet shtetërore.
Osmani ka theksuar se partitë politike duhet t’i lënë mënjanë dallimet dhe të vendosin interesin e vendit para çdo gjëje tjetër.
“E shfrytëzoj rastin që t’u bëj thirrje sërish të gjitha partive politike që të vendosin interesin e vendit para dhe t’i lënë anash dallimet. Duhet të përpiqen të formojnë një koalicion të shumicës parlamentare që do ta çojë Kosovën përpara”, ka deklaruar Osmani.
Presidentja ka theksuar se si pasojë e kësaj bllokade politike, Kosova po humbet projekte të rëndësishme të Bashkimit Evropian dhe mundësi bashkëpunimi me administratën e re të Shteteve të Bashkuara të Amerikës, për të cilat është punuar gjatë.
“Shumica e marrëveshjeve duhet të kalojnë në Kuvend për ratifikim dhe në Qeveri për zbatim. Qytetarët e Kosovës meritojnë një qeveri funksionale dhe me kapacitet të plotë”, ka deklaruar ajo.
Sipas saj, Kosova nuk e ka luksin të qëndrojë gjatë pa institucione funksionale.
“Dikush mund të thotë se Belgjika ka qëndruar dy vjet pa qeveri, Austria gjashtë muaj. E kuptoj, por Kosova nuk e ka këtë luks. Ne duhet të ecim përpara me reformat dhe me procesin e anëtarësimit në organizata ndërkombëtare”, ka theksuar Osmani.
Ajo shtoi gjithashtu se nuk beson që ka ndikim të jashtëm në vendimet e partive të mëdha politike në Kosovë.
“Është një çështje e besimit të tyre personal, se me kë duan të bashkëpunojnë. Është diçka shumë lokale”, u shpreh Osmani.
Dje ka dështuar tentimi i radhës për zgjedhje të kryetarit të Kuvendit. Partia fituese e zgjedhjeve të 9 shkurtit, Lëvizja Vetëvendosje, propozoi Hekuran Muratin, Arbërie Nagavcin dhe Dimal Bashën, por kandidatët nuk i morën votat e nevojshme.
Vazhdimi i radhës së seancës konstituive so të mbahet të martën në ora 11:00.
