Paraqitja e zëdhënësit të Forcave Mbrojtëse Izraelite (IDF), Nadav Shoshani, në programin britanik Sky News ka provokuar një reagim nga prezantuesja Jayne Secker, pasi ai pretendoi se Al Jazeera ishte në të vërtetë “Hamasi”.
Arsyeja e intervistës ishte vdekja e gazetarit të Al Jazeera, Anas al-Sharif, i cili u vra në një sulm izraelit në Gaza së bashku me pesë gazetarë të tjerë.
IDF pretendon se Al-Sharif ishte anëtar i krahut ushtarak të Hamasit dhe se ai ishte paguar nga organizata, transmeton Telegrafi.
Si prova e vetme deri më tani, Izraeli ka publikuar fotografi të pllakave të dyshuara të gjetura në Gaza, të cilat ata thonë se përmbajnë emrat e operativëve të Hamasit, përfshirë Al-Sharif.
Al Jazeera i ka hedhur poshtë plotësisht këto pretendime, ashtu si edhe vetë gazetari ndërsa ishte gjallë. Komiteti Ndërkombëtar i Gazetarëve dhe Komiteti për Mbrojtjen e Gazetarëve kanë kundërshtuar më parë akuza të tilla, dhe në korrik Komiteti paralajmëroi se Al-Sharif mund të bëhet një objektiv për vrasje.
“Ekziston një inteligjencë më komplekse dhe më e ndjeshme me të cilën duhet të jemi shumë të kujdesshëm. Nëse e deklasifikoni pa kujdes, nuk mund ta ripërdorni”, tha ai.
Shoshani shtoi se zbulimi i llojeve të caktuara të provave mund të kompromentojë burimet izraelite dhe se procesi i publikimit të një informacioni të tillë ishte “i gjatë dhe kompleks”.
Kur Secker e përballi me pretendimin se Al Jazeera ishte një organizatë ndërkombëtare lajmesh dhe jo “Hamasi”, Shoshani u përgjigj: “Nëse nuk e besoni, kjo është në rregull, por bëni punën tuaj dhe paraqisni faktet – ky është një person që festoi vdekjen e civilëve. Ai nuk është engjëlli për të cilin njerëzit po flasin. Ai është një terrorist që promovoi dhe mbështeti terrorizmin në gazetarinë e tij”.
I pyetur nëse gazetarët e tjerë të vrarë në të njëjtin sulm punuan gjithashtu për Hamasin apo ishin dëme anësore, Shoshani tha se IDF “po heton ende detajet e incidentit”.
