Prokuroria Themelore në Prizren, Departamenti për Krime të Rënda, ka ngritur aktakuzë kundër të pandehurit F.Sh., i cili ndodhet në paraburgim që nga data 9 dhjetor 2024, për shkak të dyshimit të bazuar se ka kryer dy vepra penale: “Fajdeja” dhe “Organizimi i skemave piramidale dhe bixhozit të paligjshëm”.
Sipas aktakuzës, nga shtatori 2023 deri në dhjetor 2024, i pandehuri ka dhënë para me fajde viktimës A.Z., duke përfituar shuma të mëdha përmes interesave të paligjshme. Për shembull:
Në prill 2024, i dha 10,000 euro me interes prej 15%; në qershor 2024, i dha 5,000 euro me kamatë prej 3,000 euro për vetëm 6 javë; po në qershor, një shumë tjetër prej 10,000 euro me 18% interes; në korrik, 2,000 euro me kamatë prej 20%; ndërsa në gusht, edhe 10,000 euro të tjera me 15% interes.
“Më 9 dhjetor 2024, në fshatin Shirokë të Suharekës, i pandehuri u kap në flagrancë nga Policia e Kosovës duke marrë 5,000 euro nga viktima si pagesë për kamatat e papaguara. Sipas Prokurorisë, viktima ka paguar tashmë 14,600 euro , ndërsa ka ende një borxh prej 21,400 euro vetëm në interesa, duke e çuar totalin e kamatës së paligjshme në 81,400 euro ”, thuhet në njoftim.
Po ashtu, i pandehuri F.Sh. dyshohet se nga janari deri në prill 2024 ka organizuar lojëra të fatit të paligjshme, përmes një programi elektronik pa licencë. Viktima A.Z. ka marrë pjesë në këto lojëra, duke i dhënë fillimisht të pandehurit 20,000 euro , dhe më pas duke rënë në borxh edhe për 70,000 euro të tjera. Kjo i ka shkaktuar viktimës një humbje totale financiare prej 90,000 euro .
Tutje theksohet se Prokurori i çështjes ka propozuar që pas shqyrtimit gjyqësor dhe administrimit të provave, i pandehuri të shpallet fajtor dhe të dënohet sipas ligjit, për të dy veprat penale për të cilat akuzohet.
