Në mbledhjen e Qeverisë së Kosovës, kryeministri në detyrë, Albin Kurti, tha se Serbia po vazhdon përpjekjet për destabilizimin e vendit, por ka theksuar se institucionet e inteligjencës dhe të sigurisë janë duke u kundërvënë me sukses.
Ai përmendi arrestimin e togerit të Policisë së Kosovës, Bojan Jeftiq, më 17 korrik 2025, për dyshime të bazuara për spiunazh në interes të agjencisë serbe të inteligjencës, BIA.
“Fqinji ynë agresiv Serbia po vazhdon me përpjekje për destabilizim të vendit tonë. Mirëpo, institucionet tona të inteligjencës dhe sigurisë janë duke u kundërvënë suksesshëm ndaj këtyre përpjekjeve. Këtu përfshihen edhe arrestimet e personave përgjegjës me dëshmi për aktivitetet e tyre kundër Kosovës, sikurse togeri i Policisë së Kosovës Bojan Jeftiq, i arrestuar më 17 korrik 2025 me dëshmi të bazuara të spiunazhit për interesat e BIA-së me synim të rrezikimit. Dhe Igor Popoviq i arrestuar më 18 korrik 2025 institucionet tona kanë siguruar dëshmi për lidhjet e tij me BIA-n, ndër to përfshihen edhe incizime ilegalë të 17 shtatorit që janë zhvilluar në Bruksel në objektin e BE-së në dialogun Kosovë – Serbi dhe aktivitete të tjera”, shtoi ai.
