Kamboxhia dhe Tajlanda kanë rënë dakord për një armëpushim të menjëhershëm dhe pa kushte që do të hyjë në fuqi në mesnatë sipas orës lokale, konfirmoi të hënën kryeministri malajzian Anwar Ibrahim, pas disa ditësh përleshjesh të armatosura në kufirin e kontestuar midis dy vendeve.
Marrëveshja u arrit pas bisedimeve urgjente për paqe në Malajzi, ku u takuan kryeministri kamboxhian Hun Manet dhe kryeministri në detyrë i Tajlandës Phumtham Wechayachai .
“Ishte një takim shumë i mirë. Shpresoj që luftimet të ndalen menjëherë”, tha Hun Manet, duke shtuar se konflikti tashmë ka zhvendosur deri në 300,000 njerëz në të dyja anët e kufirit.
Udhëheqësi kamboxhian falënderoi Malajzinë për ndërmjetësimin, por edhe presidentin amerikan Donald Trump dhe qeverinë kineze për kontributin e tyre në ndalimin e armiqësive. Ai theksoi veçanërisht rolin konstruktiv të kolegut të tij tajlandez Phumtham Wechayachai.
Mosmarrëveshja daton që nga kohërat koloniale, kur kufijtë e të dy vendeve u hartuan pas pushtimit francez të Kamboxhias. Konflikti u përshkallëzua në vitin 2008 kur Kamboxhia u përpoq të listonte një tempull të shekullit të 11-të që ndodhej në zonën e diskutueshme si një vend i trashëgimisë botërore të UNESCO-s, duke shkaktuar protesta të ashpra nga Tajlanda.
Përleshjet e armatosura të herëpashershme kanë marrë jetën e ushtarëve dhe civilëve nga të dyja palët që atëherë dhe marrëdhëniet u përkeqësuan më tej në maj të këtij viti, pasi një ushtar kamboxhian u vra në një nga shkëmbimet e zjarrit kufitar.
