Në shënim të 14-vjetorit të rënies së Heroit Enver Zymeri dhe Ditës Memoriale të zyrtarëve policorë të rënë në krye të detyrës, Ministria e Punëve të Brendshme e Republikës së Kosovës ka organizuar për herë të parë një sërë aktivitetesh rekreativo-sportive në pjesën veriore të vendit.
Këto aktivitete janë zhvilluar në nderim të jetës dhe veprës së pjesëtarëve të Policisë së Kosovës që kanë rënë gjatë ushtrimit të detyrës, duke reflektuar përkushtimin e tyre të palëkundur ndaj sigurisë dhe paqes në vend.
Si pjesë e programit, një grup vrapuesish nga profesione dhe komuna të ndryshme morën pjesë në një ecje simbolike përkujtimore. Aktiviteti nisi me homazhe pranë pllakës përkujtimore në vendin ku ra Heroi Enver Zymeri, për të vazhduar më pas drejt destinacionit të parashikuar.
Ministria e Punëve të Brendshme ka shprehur mirënjohje të thellë për sakrificën e të gjithë zyrtarëve policorë të rënë në krye të detyrës dhe ka ritheksuar përkushtimin institucional për ruajtjen dhe nderimin e kujtimit të tyre.
