Igor Popoviq, ndihmësdrejtor i të ashtuquajturës “Zyrës për Kosovë në qeverinë serbe”, pas ndalimit nga Policia e Kosovës mbrëmë në Bërnjak dhe pas intervistimit në Drejtorinë Rajonale në Mitrovicë-Veri, është ndaluar për 48-orë.
Lajmin për RTKlive e ka konfirmuar zëvendësdrejtori i Policisë së Kosovës për rajonin e veriut, Veton Elshani.
Popoviq dyshohet se gjatë një fjalimi të në Rahovec, ka përdorur gjuhë të ashpër kundër Ushtrisë Çlirimtare të Kosovës, duke e cilësuar atë si organizatë terroriste dhe duke krahasuar veprimet e saj me ngjarje të rënda ndërkombëtare. Ai mes tjerash ka akuzuar institucionet ndërkombëtare për dështim në drejtësi pasi si sipas tij, autorët e krimeve ndaj serbëve nuk janë ndëshkuar asnjëherë.
Lidhur me ketë ka reaguar Organizatat e dala nga lufta e Ushtrisë Çlirimtare të Kosovës, të cilat kanë vlerësuar se prania e ndihmësit të Petkoviqit në Kosovë përbën tentativë për provokim dhe përhapje të propagandës antikombëtare.
Ndërsa ministri në detyrë i Punëve të Brendshme, Xhelal Sveçla, theksoi se deklarimet si të Popoviqit janë “model millosheviqian” që mbahen ende gjallë nga presidenti serb Aleksandar Vuçiq.
“Nuk do të tolerojmë fyerje dhe përdhosje të historisë sonë, e aq më pak të Luftës sonë Çlirimtare të udhëhequr nga UÇK-ja. Kjo pjesë e historisë gëzon respektin e të gjithë botës përparimtare”, theksoi ministri në detyrë.
