Kosova Pranohet me të Drejta të Plota në Regjistrin Evropian për Sigurimin e Cilësisë në Arsimin e Lartë

Agjencia e Kosovës për Akreditim (AKA) është pranuar si anëtare me të drejta të plota në Regjistrin Evropian për Sigurimin e Cilësisë në Arsimin e Lartë (EQAR), pas një vlerësimi të pavarur dhe rigoroz nga ekspertët ndërkombëtarë të Asociacionit Evropian për Sigurimin e Cilësisë (ENQA), përcjell KosovaNews.

Në një letër zyrtare drejtuar drejtorit të përgjithshëm të AKA-së, z. Naim Gashi, presidenti i EQAR-it, z. Stéphane Lauwick, ka bërë të ditur se aplikimi i dorëzuar më 2 shkurt 2024 është miratuar plotësisht, dhe se përfshirja e AKA-së në EQAR do të jetë e vlefshme deri më 31 dhjetor 2029.

“Ju lutem pranoni urimet e mia për aplikimin tuaj të suksesshëm dhe përgëzimet e mia të përzemërta për punën tuaj, në emër të të gjithë anëtarëve të Komitetit të Regjistrit,” – thuhet në letrën e EQAR-it.

Kjo përfshirje e plotë në EQAR nënkupton se Kosova tani trajtohet si partnere e barabartë me vendet anëtare të BE-së sa i përket standardeve të sigurimit të cilësisë në arsimin e lartë. Ky është një hap gjigand drejt integrimit evropian të sistemit arsimor kosovar, duke forcuar besimin ndërkombëtar në diplomat, institucionet dhe proceset akademike të vendit.

Pranimi i plotë në EQAR shënon njërin nga sukseset më të mëdha të AKA-së që nga themelimi i saj dhe përfaqëson një vlerësim të drejtpërdrejtë për punën profesionale, përkushtimin dhe reformën e qëndrueshme në këtë fushë.