Komandanti i Policisë në Stacionin Policor në Lipjan, Argjend Gashi, ka dhënë dorëheqje nga pozita e tij, pas vdekjes së 27-vjeçarit, Agon Zejnullahu, në Lipjan.
Komandanti i Stacionit Policor në Lipjan, Argjend Gashi, bëri të ditur se ka dhënë dorëheqje morale pas rastit me 27 vjeçarin Agon Zejnullahu.
“Ende nuk jam shkarkuar, kam dhënë dorëheqje. Po kam bërë kërkesë për dorëheqje, vendimi i ri ende nuk mu ka lëshuar, por kam dhënë dorëheqje. Për shkak të zhvillimeve të fundit e kam ofruar dorëheqjen. Realisht, zyrtare nuk ka, unë jam ende në pozitën që kam qenë, mirëpo kam dhënë dorëheqje morale për shkak të zhvillimeve të fundit dhe pres vendimin e ri”, ka theksuar Gashi për Kallxo.
27-vjeçari, vdiq të hënën pak pasi u vu nën pranga nga zyrtarët policorë.
Pesë zyrtarëve policorë të cilët ishin të përfshirë në rast, u është caktuar nga një muaj paraburgim për veprën “vrasje nga pakujdesia”.
