Aleanca Kosovare e Bizneseve (AKB) ka ngritur shqetësime serioze mbi trendin e rrezikshëm të shpërndarjes së kapitalit dhe investimeve kosovare jashtë vendit, duke e cilësuar këtë dukuri si një alarm ekonomik për të ardhmen e vendit.
Sipas të dhënave të publikuara nga AKB, gjatë vitit 2024, rreth 600 ndërmarrje aktive nga Kosova kanë zhvendosur kapitalin e tyre në Shqipëri, me një vlerë totale investimesh që arrin në 100 milionë euro – shifër që përfaqëson një rritje prej 32% krahasuar me vitin paraprak. Ndërkohë, stoku kumulativ i investimeve kosovare në Shqipëri nga viti 2020 deri më tani ka arritur në rreth 450 milionë euro.
AKB thekson se ky nuk është vetëm një reflektim i interesit për tregje të reja, por pasojë direkte e klimës së pafavorshme për biznes në Kosovë, ku mungesa e përkrahjes institucionale, pasiguria ligjore dhe fiskale, si dhe mungesa e stimujve për kapitalin vendor, po i shtyjnë ndërmarrjet kosovare të kërkojnë mundësi jashtë kufijve.
“Kapitali është gjaku i ekonomisë – dhe Kosova nuk mund të përparojë duke e humbur gjakun e saj afarist”, deklaroi kryetari i AKB-së, Agim Shahini, duke paralajmëruar për pasoja të thella ekonomike dhe sociale nëse kjo prirje nuk ndalet.
Në këtë kontekst, AKB ka kërkuar:
Hartimin urgjent të një Pakti Ekonomik Kombëtar, me pjesëmarrjen e institucioneve shtetërore, sektorit privat dhe diasporës;
Reforma strukturore nga Kuvendi dhe Qeveria e Kosovës, për të krijuar një klimë tërheqëse për investimet e brendshme;
Trajtim të drejtë e të barabartë për kapitalin vendor, me eliminim të barrierave diskriminuese.
Aleanca ka kërkuar që kapitali vendor të shihet si një pasuri kombëtare që duhet mbrojtur me politika afatgjata dhe të qëndrueshme, në mënyrë që Kosova të zhvillohet nga brenda dhe jo të varfërohet duke financuar zhvillimin e të tjerëve.
