Mediat italiane pretendojnë se Milan ëndërron të nënshkruajë me Viktor Gyokeres, pasi kuqezinjtë do të mund të përmbushnin kërkesat financiare të Sporting Lisbonës, falë shitjeve të disa lojtarëve, përfshirë Malick Thiaw dhe Alvaro Morata.
La Gazzetta dello Sport dhe SportMediaset raportojnë se sulmuesi suedez Gyokeres është ngjitur në krye të listës së dëshirave të Milanit për këtë verë.
Drejtori Igli Tare konfirmoi më herët këtë javë se kuqezinjtë janë në kërkim të një sulmuesi të qendrës dhe, sipas raportimeve, Gyokeres plotëson të gjitha kriteret për ta udhëhequr sulmin në ‘San Siro’.
Gyokeres ka një klauzolë lirimi prej 100 milionë eurosh, por sipas përfaqësuesit të tij, atij i është premtuar se mund të largohet për një shumë rreth 70 milionë euro këtë verë.
SportMediaset thekson se Milani do të ketë fonde të mjaftueshme për të përballuar këtë çmim, pasi tashmë ka shitur Tijjani Reijnders te Manchester City dhe pritet të përfitojë edhe 40 milionë euro nga kalimi i Thiaw dhe Morata te Como, si dhe rreth 30 milionë euro nga transferimi i Theo Hernandez te Al-Hilal.
Sipas SportMediaset, kuqezinjtë do të kenë së shpejti 144 milionë euro të disponueshme nga shitjet, gjë që u mundëson të hyjnë në bisedime për transferimin e Gyokeres.
Megjithatë, mbetet për t’u parë nëse do të arrijnë ta realizojnë, pasi Arsenali dhe Manchester United vazhdojnë të jenë të interesuara për 27-vjeçarin dhe natyrisht mund të ofrojnë pagë më të lartë.
Gjithsesi, Gyokeres nuk është i vetmi objektiv për repartin ofensiv, pasi në listën e Igli Tares dhe Massimiliano Allegrit ndodhen edhe Mateo Retegui, Breel Embolo, Gonçalo Ramos, Emanuel Emegha, Alexander Sorloth, si dhe Vangelis Pavlidis dhe Artem Dovbyk, të përmendur nga Gazzetta dhe SportMediaset.
