Dua Lipa po vazhdon fuqishëm turneun e saj botëror Radical Optimism, dhe ndalesa e radhës ishte plot emocion në Liverpool.
Në çdo qytet që viziton, këngëtarja shqiptare zgjedh të nderojë artistët vendas – qoftë duke kënduar një prej këngëve të tyre, apo duke ftuar ata vetë në skenë. Dhe në Liverpool, zgjedhja ishte thuajse e pashmangshme.
Në mbrëmjen e së mërkurës, para 60 mijë fansave në stadiumin Anfield, Dua u ndal për një moment dhe u shpreh: “Çdo natë në këtë turne kam kënduar një këngë të ndryshme nga një artist lokal. Dhe nuk mund të vija në Liverpool pa kënduar këtë këngë”.
Më pas, ajo i dhuroi turmës një interpretim mbresëlënës të klasikës së pavdekshme të Beatles, “Hey Jude”. Video të publikuara në Instagram treguan gjithë stadiumin duke kënduar me të në kor fundin legjendar të këngës: “Na na na, hey Jude”.
Performanca e saj ishte më shumë se një homazh muzikor. Ishte një moment i veçantë për këngëtaren, e cila i tha turmës: “Ka qenë gjithmonë një ëndërr e imja të performoj këtu. Faleminderit që ma bëtë të mundur”.
Dua ka një lidhje të veçantë me qytetin, pasi hiti i saj “One Kiss” është kthyer prej vitesh në një himn jozyrtar të klubit Liverpool FC. Ajo interpretoi edhe këtë këngë, duke ngritur entuziazmin e tifozëve në maksimum.
Turneu Radical Optimism do të vazhdojë me ndalesën e radhës këtë të premte në Dublin, Irlandë.
