Pakistani u zotua të “mbështesë Iranin” dhe bëri thirrje për unitet mysliman kundër Izraelit pas sulmeve ndaj Iranit.
Duke folur në Asamblenë Kombëtare, Ministri i Mbrojtjes i Pakistanit Khwaja Asif tha se kombet myslimane tani duhet të nisin një iniciativë për të treguar unitet kundër Izraelit.
“Izraeli ka synuar Iranin, Jemenin dhe Palestinën. Nëse kombet myslimane nuk bashkohen tani, secila do të përballet me të njëjtin fat”, tha ai.
Ndër tjera, ai u bëri thirrje vendeve myslimane të cilat kanë lidhje diplomatike me Izraelin, të ndërpresin menjëherë lidhjet dhe tha se Organizata e Bashkëpunimit Islamik (OIC) duhet të mblidhet për të formuluar një strategji të përbashkët, shkruan AA, transmeton KosovaNews.
Asif tha se Pakistani ka lidhje të thella me Iranin dhe Islamabadi qëndron pranë Teheranit në këtë kohë të vështirë.
“Ne qëndrojmë pas Iranit dhe do t’i mbështesim ata në çdo forum ndërkombëtar për të mbrojtur interesat e tyre”, tha ministri.
Zëvendëskryeministri dhe Ministri i Jashtëm i Pakistanit, Ishaq Dar e quajti gjithashtu sulmin izraelit ndaj Iranit një “shkelje të paturpshme të sovranitetit të Iranit” dhe tha: “Pakistani qëndron në solidaritet me qeverinë dhe popullin e Iranit”.
Më vonë, ai foli në telefon me Ministrin e Jashtëm iranian Seyed Abbas Araghchi dhe përsëriti mbështetjen e fortë të Pakistanit për qeverinë dhe popullin e Iranit për arritjen e paqes dhe stabilitetit në rajon.
