Presidentja e Kosovës, Vjosa Osmani, e ka uruar xhudisten Distria Krasniqi, pasi fitoi medalje të argjendtë në Kampionatin Botëror të xhudos që po mbahet në Budapest të Hungarisë.
Xhudistja nga Kosova u kurorëzua nënkampione e botës në xhudo.
“Me forcë, pasion dhe zemër të pathyeshme, Distria Krasniqi ngriti flamurin e Republikës së Kosovës në piedestalin botëror! Nënkampione bote me talent, përkushtim dhe luftëtare e paepur! Urime për këtë triumf historik, je shembull frymëzimi për të gjithë” – ka shkruar Osmani në Facebook, më 14.06.2025.
Në finale të kategorisë deri në 52 kilogramë, medalistja e dyfishtë olimpike u mposht nga legjenda e xhudos, japonezja Uta Abe.
Abe në minutën e fundit realizoi hedhje për Ippon, duke u shpallur kampione botërore.
