Qeveria e Republikës së Kosovës ka reaguar me shqetësim ndaj përshkallëzimit të tensioneve mes Izraelit dhe Iranit, duke u bërë thirrje palëve të përfshira që të përmbahen dhe të shmangin çdo veprim që mund të çojë në përkeqësim të mëtejshëm të sigurisë në rajon.
Në një deklaratë zyrtare, Qeveria thekson se përshpejtimi i pasurimit të uraniumit nga Irani përbën një rrezik serioz për stabilitetin rajonal, veçanërisht pas raportimit nga Agjencia Ndërkombëtare për Energji Atomike (IAEA) se Teherani nuk po përmbush detyrimet ndërkombëtare për mospërhapje bërthamore.
“Prandaj, Irani duhet të ndalojë veprimet hibride që cenojnë stabilitetin rajonal dhe më gjerë, dhe të respektojë obligimet ndaj IAEA-së”, thuhet në deklaratë.
Kosova thekson se rruga e vetme për tejkalimin e krizës mbetet diplomacia. “Besojmë fuqishëm se zgjidhja diplomatike është mjeti i duhur për adresimin e çështjeve të sigurisë dhe ndaljen e dhunës, duke parandaluar pasoja të mëdha rajonale dhe globale.”
Qeveria i bën thirrje qytetarëve të Republikës së Kosovës që ndodhen në rajon ose kanë kontakte me vendet e përfshira, që të tregojnë kujdes të shtuar dhe të ndjekin me përpikëri udhëzimet e Ministrisë së Punëve të Jashtme dhe Diasporës, si dhe autoriteteve vendore.
Në fund të deklaratës, Kosova riafirmon përkushtimin ndaj paqes, sigurisë dhe demokracisë ndërkombëtare, duke shprehur solidaritet me të gjithë qytetarët e prekur nga zhvillimet në Lindjen e Mesme.
