Kryeministri në detyrë Albin Kurti, mori pjesë në ceremoninë e organizuar me rastin e shënimit të 40-vjetorit të Kishës Protestante Ungjillore ” Bashkësia e Popullit të Zotit”.
Ai me këtë rast tha se Kisha Protestante ka qenë një zë i paqes shoqërore, i dinjitetit njerëzor dhe shërbimit popullor për të mirën e përbashkët.
“Veprimtaria e rrugëtimit të kësaj Kishe është dëshmi e një rrugëtimi shpirtëror, qytetar dhe njerëzor të bashkësisë së besimtarëve, të cilët me përkushtim e modesti i kanë shërbyer Zotit dhe komunitetit”, tha Kurti.
Si shtylla themelore të vendit, Kurti përmendi diversitetin kulturor dhe fetar për të cilat tha se përbëjnë një ndër pasuritë kryesore të shtetit tonë gjithëpërfshirës dhe demokratik.
“Bashkëjetesa dhe respekti ndërfetar janë vlera që i ruajmë dhe kultivojmë me krenari”, tha Kurti,
Në përmbyllje të fjalës së tij, kryeministri në detyrë tha se angazhimi i komunitetit protestant në nxitjen e dialogut, edukimit, shërbimeve sociale dhe ndihmës për ata që kanë më shumë nevojë, është shembull që meriton vlerësim.
“E në veçanti, këtu do të kisha theksuar rolin për arsimin, sepse të gjithë e dimë që Gjerasim Qiriazi, ka qenë mësimdhënës në shkollën shqipe në Korçë, në vitet 1887, dhe kjo traditë e kontributit për arsimin shqip është jetike për kombin tonë, sepse shqiptarët, para së gjithash, e mbi të gjitha, janë komb i gjuhës, e arsimi është institucionalizimi i kombit, si komb i gjuhës. E në këtë përvjetor jubilar, të nderuar të pranishëm, dua të shpreh mirënjohjen time dhe të Qeverisë së Kosovës për kontributin tuaj të çmuar për vendin tonë. Uroj që ky përvjetor të jetë një pikë reflektimi dhe besimi për të ecur përpara dhe së bashku,” përfundoi ai.
